NAGA CITY– Boluntaryong nagsuko sa mismong Provincial Director kan Camarines Norte Police Provincial Office (CNPPO) an Chief of Police (COP) kan Paracale PNP katakod kan kasong murder na kinaimbweltuhan kaini.
Sa entrevista kan Bombo Radyo Naga sa bagong Provincial Director kan CNPPO na si PSSupt. Cerilo Trilles, sinaysay kaini na personal na nagsuko sa saiya si PSInsp. Manuel Sarmiento makalihis magpaluwas nin warrant of Arrest an korte huli sa kasong Murder na pigsunad mismo kan National Bureau of Investifgation (NBI).
Sigon ki Trilles, nag-ugat an nasambitan ng kaso sa tahaw kan anti-illegal drug operations kan kapulisan kunsaen duwang pigtutubudang drug personality an soboot nagadan makalihis manlaban.
Makalihis an operasyon, nakaresibe pa soboot nin award an mismong opisyal asin an tropa kaini huli sa nasambitan ng achievement alagad bigla soboot nagkaigwa nin reinvestigation an NBI na napuli sa kaso.
Sa suway naman na entrevista kan Bombo Radyo Naga ki Sgt. Bong Intia kan NBI-Naga, sinaysay kaini na naghiro sana sinda kan makaresibe nin request gikan sa Sangguniang Bayan kan Paracale sa Camarines Norte na imbestigaran giraray an insidente.
Nagluwas soboot sa saindang imbestigasyon na mayong buy bust operation na nangyari asin dae man nagpurbar na manlaban an duwa katao na pigtutubudang drug personalities.
Katakod kaini, nahilingan soboot nin probable cause kan korte an nasambitan ng kaso kung kaya nagpaluwas nin warrant of arrest kontra sa nasambitan ng opisyal.
Sa ngunian, nagtitinir na sa kustodiya kan Camarines Norte PPO an nasambitan ng hepe para sa maninigong disposisyon.
