NAGA CITY- Ikinamundo kan sarong commuters group an planong nationwide 2-day transport strike kan mga drivers asin operators na nakatalaan na gibuhon sa Disyembre 4-5.
Sigon ki Atty. Ariel Inton, presidente kan Lawyers for Commuters Safety and Protection, sinaysay kaini na ikinamundo ninda an bareta na liwat na makondusir nin strike an mga jeepney drivers asin operators katakod kan saindang pagkontra sa jeepney modernization na pigtutulod kan Duterte Administration.
Nirerespeto suboot ninda an diretsos kan transport sector na magkondusir nin mga hiro protesta alagad direktang apektado sa nasambitang lakdang an mga pasahero siring man an ekonomiya kan nasyon.
Mientrastanto, sigon ki Inton, dapat na magkaigwa nin ‘win-win’ solution pag-abot sa jeepney modernization kun saen kakayanon kan mga drivers asin operators na magsunod sa nasambitang polisiya.
Kontra suboot an saindang grupo sa total phase out kan mga jeep alagad pabor sinda sa planong pag-modernized sa mga ini.
