NAGA CITY- Inako ngonyan kan nagpabistadong miyembro kan rebeldeng New People’s Army (NPA) an nangyaring pananambang kan nakaaging Sabado sa duwang police mobile sa Labo, Camarines Norte.
Basado sa pahayag kan Armando Catapia Command kan NPA, inako kan mga ini an nangyaring pananambang sa mga kabuhan kan Camarines Norte Provincial Mobile Force Company (CNPMFC) sa parte kan barangay Daguit na nagresulta sa pagkagadan kan sarong pulis mantang irido man an anom na iba pa.
Nakumpiskar suboot kan rebeldeng grupo an apat na mga M16, sarong 9mm na badil asin mga bala hale samga pulis makalihis an haros 15-minutong putukan.
Mayo man suboot nairehistrong nairido sa lado kan mga rebelde katakod kan nangyaring ambush.
Susog sa nasambitang grupo an saindang lakdang pagpapahiling kan saindang pagkondenar sa kanselasyon kan peacetalks sa pag-ultanan kan CPP-NPA-NDF asin kan gobyerno ni presidente Rodrigo Duterte siring man an pag-apod kaini terorista sa sainda.
Marurumduman na ala-1 nin mag-uumagahon kan Disyembre 2 kan tambangan kan pigtutubudang mga NPA an duwang police mobile na pabalik na kuta na sa provincial command kan Camarines Norte Police Provincial Office makalihis na magkondusir nin internal security operation sa banwaan nin Labo.
