NAGA CITY- Liwat na naman na nairehisto an harong sunod-sunod na rockslide asin mudslide sa tolong barangay sa banwaan nin Sagñay, Camarines Sur.
Sa entrevista kan Bombo Radyo Naga ki Don Panoy, bagong pamayo kan Municipal Disaster Risk Reduction and Management Office (MDRRMO) Sagñay, sinaysay kaini na alas-3 nin mag-uumagahon ngonyan na aldaw kan mairehistro an pagtupas nin gapo sa barangay Patitinan mantang nagkaigwa man nin mudslide sa barangay Bungalon.
Nairehistro man suboot an landslide sa parte kan barangay Sibaguan na nagresulta para magbigay an porsyon nin tinampo sa nasambitang lugar.
Huli digdi, paramientras na muna na dae tinutugutan kan MDRRMO-Sagñay na makaagi an mga darakulang bihikulo sa lugar para makalikay sa anuman na problema huli sa pangyayari.
Sigon ki Panoy, nagpapadagos pa an pigkokondusir na clearing operations kan Department of Public Works and Highways (DPWH) asin swerte man na mayong nairehistrong casualty sa nangyaring rockslide asin landslide sa nasambitang tolong mga barangay.
Mientrastanto, pigtuga man ni Panoy na posibleng magkaigwa pa nin pagtupas nin daga sa Tiwi-Sagñay Road dahil sa posibleng epekto kan bagyong Vinta sa probinsya nin Camarines Sur.
Sa ngonyan, padagos pa suboot an ginigibong rapid damage assessment and needs analysis kan MDRRMO-Sagñay katakod kan pangyayari.
Marurumduman na suodma, nairehistro an pagtupas nin gapo sa barangay Patitinan huli sa namamatean na pag-uuran sa probinsya.
