Ipinahayag ni Department of Agriculture (DA) Secretary Francisco Tiu Laurel Jr. na padagos an pakikipag-ugnayan kan ahensya sa mga sub-agency kaini tanganing atubangon an huma kan pinatinding El Niño sa nasyon.
Inatasan ni Laurel an National Food Authority (NFA) na gamiton an dakulang porsyon kan badyet kaini tanganing magbakal asin mag-imbak nin paroy asin bagas para mapano an mga bodega kaini, orog na ta aniya nasa 40 % na sana an natatadang ani sa nasyon na kaipuhan bakalon bago matapos an panahon nin pag-ani.
Pigsierto man kan ahensya na pano an mga cold storage facility para sa iba pang produktong agrikultural, mantang padagos an pagwaras nin solar pump irrigation sa mga lugar na igwa pang mapagkukuanan nin tubig tanganing mabawasan an epekto kan tagtuyot.
Pigsierto kan kalihim na nagdadanay an kumpiyansa kan ahensya na dai mawawaran nin mga pangenot na barakalon sa merkado sa kabilugan.
Segun pa sa opsiyal an pag-aangkat o importation an magigin huring opsyon sana kan gobyerno kun magkaigwa man nin shortage sa lokal na produksyon.
Sa pag-orolay naman kan pondo, nakaresibe na an ahensya nin P2.6 billion hale sa hinahagad na P45-billion supplemental budget para sa tulos na pagpapatupad kan mga mitigating measures kontra sa krisis asin El Niño.
Piglalaoman man kan ahensya an dugang na P10 billion para sa solar irrigation, pumps, asin bio-fertilizers, pati na para sa Presidential Assistance to Farmers and Fisherfolks bilang pagpreparar asin tabang sa mga parauma asin parasira.
