NAGA CITY- Nagsapo nin lugad sa duwang guramoy an sarong 10-anyos na aki makalihis na maputukan ini nin pigpapangalad na paputok na piccolo pirang oras antes an pagsabat sa bagong taon.
Sa entrevista kan Bombo Radyo Naga ki Maria Beltran, ina kan 10-anyos na aki na nabiktima nin paputok asin residente kan barangay San Jose sa banwaan nin Minalabac, Camarines Sur, sinaysay kaini na dae niya nahiling na naggagamit na nin piccolo an saiyang aki asin nabigla na sana siya kan mahiling na nagdurugo na an guramoy kaini.
Basado sa istorya kan menor de edad, dae niya nabutasan an piccolo kaya aksidente ining nagputok sa saiyang kamot.
Sigon ki Beltran, dae niya aram saen posibleng nabakal o nakua kan saiyang aki an nasamabitang pigpapangalad na paputok.
Mienatrastanto, pigdalagan man sa Bicol Medical Center (BMC) an 13-anyos na solterito hale sa barangay Concepcion Pequeña, Naga City makalihis na maputukan man nin piccolo sa saiyang tuong kamot na tulos man na pigbulong.
