NAGA CITY- Maabot sa haros P100,000 na kantidad nin mga paputok asin pyrotechnic devices an nakumpiskar kan mga otoridad sa tolong banwaan asin sarong ciudad sa probinsya nin Quezon sa pagsabat nin bagong taon.
Sa nagunong impormasyon kan Bombo Radyo Naga, napag-araman na labi sa P85,000 na kantidad nin manlaen laeng mga abandonadong iligal na paputok an nakumpiskar kan mga otoridad na pigpapabakal suboot sa manlaen laeng mga barangay sa ciudad nin Lucena.
Kabale sa maga nakumpiskar na iligal na paputok an Pakyaw, Bin Laden, Super Lolo, Pla Pla, Giant Whistle Bomb, Mother Racket asin sinturon ni Judas.
Nakumspikar man kan mga pulis an haros P3,000 na kantidad nin mga iligal na paputok sa banwaan nin Tiaong alagad dae na ninda naabutan an suspek na marikas na nakadulag.
Mientrastanto, kahon-kahon man nin Pop Pop Snapper Ring, 20 pidaso nin Sparklers asin 10 dosena nin Luces an inabandonar asin nakumspikar kan mga otoridad harani sa Public Market sa barangay Tres sa banwaan nin Calauag.
Kinostudiya man kan mga pulis si Aiza Sarigala, 28-anyos makalihis na mapatotoohana na nagpapabakal ini nin mga paputok sa luwas kan designated area kan lokal na gobyerno kan Calauag.
Nakatalaan man na rauton kan mga otoridad an kahon-kahon na iligal na mga paputok na saindang nakumpiskar.
Sa probinsya man nin Camarines Sur, kinumpiskar kan mga pulis hale sa PNP Lagonoy an 100 pidaso nin kwitis, sarong kahon nin piccolo asin haros 40 pidaso nin sparklers na sinasabing pagsasadiri ni Ramer Flores, 36-anyos huli sa kawaran kaini nin maninigong permit.
