NAGA CITY – Gadan an sarong tricycle driver mantang irido man an walong iba pa sa karambola kan limang bihikulo sa Calabanga, Camarines Sur.
Binisto an biktima na si Seth Coballes, 42-anyos.
Sa entrevista kan Bombo Radyo Naga ki SPO2 Rhoderick Macawili, kinakan suboot kan SUV na minamaneho ni Ronnel Velarde, 29-anyos an linya na binabagtas kan motorsiklo na minamaneho man kan sarong Mark Gil Gesmundo, 30-anyos.
Huli digdi, sumalpok sa motorsiklo ni Gesmundo an sarong tricycle na minamaneho ni Coballes, asin duwa pang mga motorsiklo na minamaneho man ninda Aldrin Froyalde, 22-anyos asin Lloyd Corredo.
Nagsapo nin lugad sa manlaen laeng parte kan saindang lawas an anom na lunad kan pampasaherong tricycle kaibanan an duwang backrider kan motorsiklo ni Froyalde asin an mga driver kan nasambitang mga bihikulo na tulos man na naidalagan sa ospital.
Huli sa labing lugad sa lawas, pigdeklarar nang dead on arrival kan mga doktor an driver kan tricycle na si Coballes.
Sa ngonyan, nagpapadagos pa an imbestigasyon kan mga otoridad katakod kan nasambitang insidente.
