NAGA CITY- Nagkasararo ngonyan an mga Overseas Filipino Workers (OFWs) hale sa manlaen laeng parte kan kinaban sa pagkokondusir nin fund raising campaign komo tabang sa mga naapektaran kan pag-aalburuto kan bulkang Mayon sa probinsya nin Albay.
Sa entrevista kan Bombo Radyo Naga ki Sylvia Espinosa, pamayo kan ‘Basta Bicol Oragon’ group sa South Korea, sinaysay kaini na nakatipon an saindang grupo hale sa manlaen laeng parte an kinaban nin maabot sa P23,000 sa laog sana nin apat na aldaw.
Sigon ki Espinosa, partikularmente nindang ipinadara an nasambitang donasyon sa Barangay Anislag, sa banwaan nin Daraga huli ta basado sa saindang nakuang impormasyon, mayo pa suboot ining nakukuang asistensya.
Hale sa nasambitang kantidad, naipanao suboot kan saindang grupo an bagas, noodles asin malinig na inumon na tubig sa haros 200 na indibidwal.
Dugang pa ni Espinosa, dae pa digdi natatapos an saindang pagpapaabot nin tabang asin pigsierto kaini na pirming nakaandam an saindang organisasyon kun kinakaipuhan.
Mientrastanto, mensahe kan nasambitang OFW sa mga presenteng apektado kan abnormalidad kan Bulkan Mayon na magtenir salbado asin dae makalingaw na maghagad nin giya sa Kagurangnan.
