NAGA CITY-Posible suboot na ma-extend pa an pigpapautob na kanselasyon kan byahe kan mga eroplano pasiring sa Bicol region urog na kun mapadagos pa an pag-aalburuto kan Bulkang Mayon.
Sa entrevista kan Bombo Radyo Naga ki Evelyn Soneja, representante kan Civil Aviation Authority of the Philippines (CAAP), sinaysay kaini na pasiring sa norteng sulnupan an duros kaya nakakaabot na ngonyan an ash fall sa banwaan kan Pili kun saen makukua an Naga Airport.
Enot kaini, nagdesisyon an CAAP na ikanselar muna an Manila-Naga asin Naga-Manila flights urog pa ta igwa suboot maraot na epekto sa ekipahe kan eroplano enkaso mahigot kaini an abong pigbubuga kan bulkan.
Alagad, pighihiling pa suboot ninda an posibilidad na maibwelta na saaga, Enero 26, sa normal an operasyon kan nasambitang aeropuerto.
