NAGA CITY – Nadugangan pa ngonyan an barangay sa Camarines Sur na apektado kan abo na hale sa Bulkang Mayon.
Ini an kinumpirmar ni Lizel Macatangay, tagapagtaram kan Incident Management Team sa entrevista kan Bombo Radyo Naga.
Sigon ki Macatangay, hale sa 196 na barangay, nagsakat na ini sa 208 makalihis na maidugang digdi an mga barangay hale sa Pili asin Bula.
Mientrastanto, mas pinahigot ngonyan kan grupo an pagbabantay sa mga apektadong lugar makalihis na mairehistro na an pagkagadan kan mga ataman na manok, pangungulog nin tulak kan mga kaakian, eye irritation asin moderate asthma attack o hika sa banwaan nin Balatan asin sa ciudad nin Iriga.
Katakod kaini, nagpaapod na suboot nin emergency meeting ngonyan na aldaw si Gov. Migz Villafuerte para masolusyunan an nasambitang problema.
Liwat man na nagpagirumdom si Macatangay sa mga residente na magtenir na sana muna sa saindang mga harong asin pirming makipagkoordinar sa mga otoridad sa mga epektong dara kan ash fall.
