NAGA CITY-Dae nagpahuri an mga Bicolano sa manlaen laeng mga pakulo nagkapirang oras antes an February 14 o Valentine’s Day.
Sa opisina kan Land Transportation Office (LTO) Bicol, mati mati na an espiritu kan aldaw nin mga puso huli sa mga nakadukot na mga ‘hugot asin pick-up lines’ sa laog kan saindang opisina na inaapod nindang #LTOHugot lines na konektado sa mga transaksyon asin orolay na pirming kinakaatubang kan saindang opisina.
Trending sa social media ngonyan an saro sa mga hugot lines an linyang ‘Kung may strike na tigil pasada, sana meron ding strike na ‘Tigil Paasa” asin ‘Ang pagtataksil ay parang
checkpoint, pag nahuli ka, lagot ka.’
Sa City Hall man kan ciudad nin Naga, nagpaluwas pa nin memorandum circular si Mayor John Bongat para obligaron an mga empleyado na magsulot nin bado saaga na basado sa saindang relationship status.
Basado sa nasambitang circular, kaipuhan magsulot nin pulang bado kan mga taken, itom para sa mga taken for granted, green sa mga “solo for life,” puti sa mga “like a virgin,” brown sa pusong bato, kolor abo man sa mga tuliro, yellow sa “waiting since birth” asin kadakol pang pilyong mga paglaladawan kan mga relationship status kan mga empleyado.
Mientrastanto, saaga, ikokondusir man sa Plaza Rizal sa ciudad nin Naga an sarong spoken poetry kasabay kan Valentine’s day.
Sa entrevista kan Bombo Radyo Naga ki Allen Reondanga, head kan City Events Protocol and Public Information Office (CEPPIO), alas-6:30 nin banggi saaga ikokondusir an nasambitang aktibidad na obhetong mas maipamate kan mga jovenes an mawot na ipasabot kan tataramon na “love” sa paagi nin tula.
Nilalaoman man saaga na mapasiring sa Naga City Hall an ikaduwang aki ni Vice President Leni Robredo na si Tricia para manao nin rosas sa mga empleyado digdi komo parte kan haloy ng tradisyon kan pamilya Robredo.
