NAGA CITY-Arestado sa sarong entrapment operation an sarong daragang pigtutukdong yaon sa likod kan nangyaring human trafficking sa ciudad nin Lucena.
Sa nakuang impormasyon kan Bombo Radyo Naga, an pinagsarong pwersa kan PNP-Pagbilao asin Lucena City an nagkondusir kan operasyon sa 101 Hotel sa Barangay Bocohan sa nasambitang ciudad.
Digdi na suboot naabutan an suspek na si Myrjane Cayasa, 18-anyos.
Naisalbar hale sa kamot kan nasambitang suspek an tolong mga menor de edad na imbwelto suboot sa usmak na mga aktibidad.
Enot kaini, nagdulok na suboot sa PNP an magurang kan mga aki makalihis na madiskubre an modus ni Cayasa na ngonyan nagtitinir na sa custodial facility kan pulisya mantang pig-aandam naman an kasong pagbalgar sa RA 9208 o Anti-Trafficking in Persons Act of 2003 laban digdi.
Mientrastanto, pigsairarom man sa counselling an tolong mga menor de edad kabale na an saindang mga magurang sa tabang kan mga social workers sa lugar.
