NAGA CITY- Nakatalaan na ipresentar ni Presidential Adviser on Political Affairs Sec. Francisco Tolentino sa cabinet meeting kan Duterte Administration an mga plano asin suhestyon kan saiyang opisina para sa rinibong mga evacuees na apektado kan padagos na pag-aalburuto kan Bulkang Mayon sa probinsya nin Albay.
Sa entrevista kan Bombo Radyo Naga sa sekretaryo, sinaysay kaini na makikipagtabangan an saiyang opisina sa Department of Public Works and Highways (DPWH), National Housing Authority (NHA) asin sa Department of Interior and Local Government (DILG) para sa paggibo nin prototype model kan sarong permanent evacuation center sa nasambitang probinsya.
Sigon ki Tolentino, padagpos an saindang pakikipagkoordinar sa mga regional directors kan manlaen laeng mga ahensya kan gobyerno para masierto na nasisimbagan an pangangaipuhan kan mga evacuees.
Mientrastanto, ikinaugma man ni Tolentino an padagos na pagbulos nin mga tabang para sa labi sa 60,000 mga residenteng hasta sa ngonyan nagtitinir pa nanggad sa mga evacuation center.
