NAGA CITY- Pigsierto kan Philippine Drug Enforcement Agency (PDEA) na padagos an saindang ginigibong operasyon para lapagon an mga miyembro kan darakulang drug syndicates na nag-o-operar sa Pilipinas.
Ini an kinumpirma ni PDEA Bicol Dir. Christian Frivaldo sa entrevista kan Bombo Radyo Naga.
Sigon ki Frivaldo, an pagkakadakop sa mga pigtutubudang miyembro kan African drug syndicate na sinda Agu Agustin Chukwuebuka asin Nkwocha CHimaobi sa operasyon sa Cavite resulta suboot kan ginigibong follow-up operations kan PDEA Bicol.
An nasambitang sindikato suboot an pinaghahalean nin droga na pigbabagsak sa Bicol kaya man ini an target kan mga operasyon sa ngonyan kan ahensya.
Dugang pa ni Frivaldo, an African drug syndicate kabale sa mga pigkokonsiderar na transnational drug syndicate na nag-o-operar sa nasyon kabale na suboot an mga grupo nin Chinese asin Mexican.
Mientrastanto, naglalaom man an opisyal na sa pagkakaarestar sa duwang miyembro kan nasambitang African drug syndicate, mas maiinaan pa an suplay kan iligal na droga sa rehiyong Bicol.
Marurumduman na nakumpiskar sa mga suspek an pigkakarkulong nasa 500 grams nin iligal na droga.
