NAGA CITY- Naipuli na sa banwaan nin Buhi sa probinsya nin Camarines Sur an lawas kan mag-irina na minasaker kan sadiring padre de pamilya sa barangay Calunacon, San Andres, Romblon.
Sa nakuang impormasyon kan Bombo Radyo Naga, napag-araman na aldaw nin Sabado kan maipuli an bangkay kan mag-irinang Mylene Talangan, 31-anyos; Emilyn, 9-anyos asin Erwin James, 5-anyos.
Nagpaabot man kan saindang raot boot an pamilya Talangan huli sa pigsapo kan saindang kaparyentes sa kamot kan live in partner kaini na si Michael Forlaje Falceso, 33 anyos.
Napag-araman na kan nakaaging bulan nin Disyembre huring nahiling kan ama ni Mylene an mga ini kan magpasiring siya sa Romblon para bisitahon an saiyang aki asin makuapo.
Marurumduman na mayong herak na pinagtataga kan suspek na si Falceso an saiyang mag-irina mantang nagadan man kan nagrespondeng mga pulis an suspek makalihis suboot na purbaran na manlaban.
