NAGA CITY- Duwang mga miyembro kan Civilian Armed Forces Geographical Units (CAFGU) an nairehistrong nairido makalihis na i-harass suboot kan mga rebeldeng New People’s Army (NPA) an detachment kan mga ini sa barangay Casay sa banwaan nin Lupi, Camarines Sur.
Sa entrevista kan Bombo Radyo Naga ki Col. Paul Regencia, spokesperson kan 9th Infantry Division, Philippine Army, alas-8 nin aga suodma, Marso 12 kan bigla na sanang pauranan nin bala kan pigtutubudang mga NPA an Casay detachment na kinokonsiderar na stronghold kan mga CAFGU sa lugar.
Nakabalos man suboot nin putok an mga CAFGU kaya nagkaigwa nin haros duwang minutos na riribayan nin putok sa pag-ultanan kan duwang lado antes na dagos na nag-atras an mga rebelde.
Sigon ki Regencia, duwang CAFGU member an nagsapo nin minor injury na binisto sana sa alyas na CAA Ramos asin CAA Dela Peña na tulos man pigbulong.
Nagtutubod man si Regencia na planado an nangyaring pangha-harass sa Casay detachment komo parte kan pagpapamate kan mga rebelde katakod kan saindang papaabot na anibersaryo sa Marso 29.
Enot kaini, inatake man kan mga pigtutubudang NPA an community support program team kan Philippine Army sa probinsya nin Camarines Norte mantang sarong Cafgu man an nairehistrong binawian nin buhay makalihis na tambangan kan mga rebelde sa banwaan nin Del Gallego sa Camarines Sur.
