NAGA CITY- Nag-aandam na an mga otoridad sa banwaan nin Calabanga, Camarines Sur sa posibleng pagruso kan rinibong mga deboto kan nakahigda na Poong Hesu Kristo o bistado man sa apod na ‘Amang Hinulid’ katakod kan ikokondusir na tradisyonal na pagkarigos digdi saaga, Miyerkules Santo.
Sa entrevista kan Bombo Radyo Naga ki Rebecca Hilario, caretaker kan nasambitang imahe, sinaysay kaini na preparado na an saindang mga gigibuhon katakod kan tradisyonal na pagkarigos sa Amang Hinulid sa kapilya kaini sa barangay Sta Salud sa nasambitang banwaan.
Sigon ki Hilario, pinapanao ninda an mga ginamit na cotton, tuwalya asin tubig sa pagkarigos ki Amang Hinulid sa mga deboto na mapasiring sa lugar.
Pigtutubudan suboot kan mga deboto na nakakapagparahay nin mga helang an tubig na ginamit sa pagkarigos sa nasambitang imahe.
Katakod kaini, nakadeploy na man an mga kabuhan kan Philippine National Police (PNP) asin iba pang mga force multipliers para masierto an seguridad kan rinibong mga deboto na nilalaoman na maruso sa nasambitang lugar saaga.
