NAGA CITY- Ikinadisganar kan lokal na gobyerno kan banwaan nin Bula, Camarines Sur an pagkakadakop sa saro sa saindang empleyado na nakunan nin bulto-bultong pigtutubudang shabu kan Philippine Drug Enforcement Agency (PDEA).
Sa entrevista kan Bombo Radyo Naga ki Carlos Fontanal, private secretary ni Mayor Amelita Evasco, sinaysay kaini na enot nang tinawan nin pagkakataon an suspek na si Sylvia Valera na makapagbagong buhay makalihis ining magsuko sa Oplan Tokhang kan Philippine National Police (PNP).
Sigon ki Fontanal, tinawan pa nin trabaho si Valera komo utility worker sa public market kan nasambitang banwaan.
Katakod kaini, tinawan doon ni Fontanal na dapat kahampangon ni Valera an anuman na kasong isasangat laban sa saiya.
Nagpapasalamat man suboot an saindang alkalde na dagos nang nadakop si Valera para mainaan naman an mga taong padagos na nagtutulod nin droga sa saindang banwaan.
Kun marurumduman, nadakop si Valera kan PDEA sa hampang mismo kan sarong eskwelahan sa banwaan nin Canaman kun saen haros apat na bulto nin pigtutubudang shabu an nakumpiskar sa pag-iingat kaini.
