Saro gadan sa engkwentro kan tropa nin gobyerno asin NPA sa CamNorte

NAGA CITY- Gadan an sarong pigtutubudang miyembro kan rebeldeng grupong New People’s Army sa nangyaring engkwentro sa Barangay Itok, Capalonga, Camarines Norte.

Sa nakuang impormasyon kan Bombo Radyo Naga, napag-araman na nagkaengkwentro an tropa kan 9th Infantry Division (ID), Philippine Army (PA) asin pigtutubudang mga miyembro kan rebeldeng New Peoples Army (NPA) sa nasambitang lugar na naghaloy nin haros 20 minuto.

Makalihis an insidente, tulos man na nagdurulag an mga rebelde mantang nawalat sa lugar kan bakbakan an bangkay kan saro sa mga ini.

Mientrastanto, mayo man nairehistrong nairido sa tropa kan gobyerno.

Sa ngonyan, nagpapadagos man an ginigibong hot pursuit operation kan mga kasoldadusan sa nasambitang lugar.