NAGA CITY- Inaabangan ngonyan an huring laban kan kaenot-enoting Bicolana gold medalist sa Palarong Pambansa 2018 sa maabot na Huwebes.
Sa entrevista kan Bombo Radyo Naga ki Mark Kevin Arroco, Project Development Officer II kan Department of Education (DepEd) Bicol, sinaysay kaini na inaabangan ngonyan an huring laban ni Lheslie De Lima sa 1500-meter run para sa finals kun saen makakalaban kaini an mga delegado hale sa National Capital Region (NCR) asin duwang iba pa.
Naglalaom man si Arroco na makakakua liwat nin bulawan na medalya si Lheslie urog pa ta labi suboot an nagin training kaini sa nasambitang kategorya.
Enot naman na nagpahayag kan saiyang pagbilib si Arroco sa 13-anyos na atleta na tuod suboot na magkawat na nakabitis dawa na mainit an panahon.
Mientrastanto, dae man nawawaran nin paglaom an DepEd Bicol na makukua pa kan rehiyon an target na magtapos sa rank number 5 sa national sporting event ngonyan na taon.
Marurumduman na nakua suodma ni De Lima hale sa Baao National High School sa probinsya nin Camarines Sur an pinakaenot na gold medal sa Palarong Pambansa makalihis na magtrayumpo sa 3kms run.
