NAGA CITY– Apwera sa cash incentive, bibistuhon man komo Athlete of the Year an gold medalist sa Palarong Pambansa 2018 gikan sa syudad nin Naga.
Sa entrevista kan Bombo Radyo Naga ki Mayor John Bongat, sinaysay kaini na an grade 6 gikan sa Naga Central School I na si Julius Glen Vasquez an makakarisibe nin Athlete of the Year Award sa gigibuhong Mayoral Awards sa charter anniversary kan Naga sa bulan nin Hunyo.
Maabot man sa kabilugang P47,000 an makukuang cash incentive ni Vasquez para sa pitong medalyang hinakot kaini sa Palaro na kinababalehan kan duwang gold, sarong silver asin at apat na bronze medal para sa swimming.
Sigon ki Bongat, sarong orgulyo kan gabos an nagin trayumpo ni Vasquez bako sana sa syudad nin Naga asin Bicol Region alagad pati na sa nilog na nasyon huli ta pwede ining magrepresentar sa mga international competitions.
