NAGA CITY- Gadan an sarong motorista mantang irido man an saro pa makalihis na magsalpok sa truck an nilulunadan kaining motorsiklo sa Sariaya, Quezon.
Binisto an nagadan na si Joel Lascieras, 43-anyos mantang nairido man an backrider kaini na si Patrick Morong, 31-anyos.
Sa nagunong impormasyon kan Bombo Radyo Naga, napag-araman na binabagtas kan motorsiklo na minamaneho ni Lascieras an kalabaan kan Eco Tourism Road sa barangay Bignay 1 kan bigla na sana ining makasalpok sa truck na minamaneho man ni Bernardino Gawa, 34-anyos.
Nagsapo nin lugad sa saiyang lawas si Lascieras na nagresulta sa tulos na kagadanan kaini mantang pigdalagan man sa ospital si Morong para maipabulong an pigsapong lugar kaini.
Pigbibilaran naman sa ngonyan an bangkay ni Lascieras sa saindang lugar sa barangay Sampaloc 2 sa parehong banwaan mantang nagpapadagos pa man an imbestigasyon kan mga otoridad sa pangyayari.
