(UPDATE) NAGA CITY- Maikokonsiderar na accident prone area suboot an lugar kun saen nangyari an karambola kan tolong bihikulo sa banwaan nin Ragay, Camarines Sur na nagresulta sa pagkagadan kan duwang indibidwal mantang nairido man an duwang iba pa.
Binisto an mga nagadan na sinda Bernardo Esta, 44-anyos asin Jhun Phol Esta, 26-anyos.
Sa entrevista kan Bombo Radyo Naga ki PO2 Romeo Dela Vega hale sa PNP Ragay, sinaysay kaini na pasiring kuta na sa fiestahan an mga lunad kan duwang motorsiklo kan aksidente na makabangga an motorsiklo na minamaneho ni Esta sa sarong wing van na minamaneho ni Rechie Ganado, 41-anyos.
Sigon ki Dela Vega, kinakan kan wing van an ibong na tinampo asin aksidenteng nakasalpok digdi an nag-overtake na motorsiklo ni Esta na nagresulta para makasalpok pa ini sa kasunudan na motorsiklo na minamaneho ni Justine Delos Reyes, 19-anyos kaibanan an backrider na si Wilson Almediere, 23-anyos.
Nagsapo nin lugad sa saindang lawas sinda Delos Reyes asin Almediere mantang tulos man na pigbawian nin buhay sinda Bernardo asin Jhun Phol.
Basado sa inisyal na imbestigasyon kan PNP, napag-araman na magpinsan suboot an nagadan na mga biktima.
Susog sa PNP, ini na an panduwang beses na nagkaigwa nin nangyaring aksidente sa nasambitang lugar ngonyan sanang bulan nin Mayo.
