NAGA CITY- Nagpagirumdom an Commission on Elections (Comelec) sa mga kandidato manungod sa paggamit kan nagkapira sa mga ini kan mga superhero characters para sa saindang mga campaign posters ngonyan na barangay asin Sanguniang Kabataan (SK) Elections.
Sa entrevista kan Bombo Radyo Naga ki Atty. Maico Julia, election officer kan Comelec-Naga, sinaysay kaini na posibleng mahampang sa reklamong copyright infringement na isusunad kan mga kompanya na maysadiri kan nasambitang mga superhero characters an mga kandidato na naggamit kaini na mayong maninigong permiso hale sa mga ini.
Pahayag ini ni Julia makalihis na mag-viral sa mga social media sites an manlaen laeng gimik sa mga kandidato sa saindang mga election material arog na sana kan pag-edit kan saindang mga lalawgon asin ipigbugtak ini sa movie posters kan superhero film na Avengers mantang igwa man suboot nagpagibo pa nin ‘life size superhero figure statue’ para makua sana an atensyon kan mga botante sa saindang lugar.
Mientrastanto, liwat man na nagpagirumdom si Julia sa gabos na kandidato na mag-utob an mga ini sa polisiya kan Comelec urog na pag-abot sa pagbubugtak kan saindang mga posters.
