NAGA CITY- Pigklaro kan mismong regional director kan Commission on Election (Comelec) Bicol na mayo pa sindang rekomendasyon sa ngonyan para pormal nang ipasairarom sa kontrol kan ahensya an probinsya nin Masbate katakod kan paparani na barangay asin Sangguniang Kabataan (SK) Elections.
Pahayag ini ni Comelec Bicol Director Atty. Maria Juana Valeza kasunod sa enot nang sinaysay ni PNP Chief P/Dir. Gen. Oscar Albayalde na isinairarom na suboot sa kontrol kan Comelec an nasambitang probinsya kun saen magkakaigwa ini nin Special Operations Task Group Masbate.
Sigon ki Valeza, nakatalaan pa nindang pag-orolayan an nasambitang lakdang asin mayo pang nareresibeng impormasyon an saiyang opisina manungod digdi.
Sa opinyon man ni Valeza, kadakol an posibleng magin epekto sa probinsya enkaso dagos na ining mapasairarom sa kontrol kan Comelec.
Mientrastanto, sigon ki Capt. Joash Pramis, Chief, Division of Public Affairs Office (DPAO) kan 9th Infantry Division, Philippine Army, sinaysay kaini na basado sa napag-oroyunan kan Joint Task Force Bicolandia, nakatalaan na magpadara nin sarong company nin mga soldados hale sa bagong 96th Infantry Battalion sa probinsya nin Masbate para masimbagan an concern kan Comelec urog na sa seguridad digdi sa maabot na pirilian sa Mayo 14.
