NAGA CITY- Nagtutubod an Philippine National Police (PNP) na isolated case sana an nangyaring pambabadil gadan kan duwang armadong kalalakihan sa sarong municipal councilor sa banwaan nin Sariaya.
Sa entrevista kan Bombo Radyo Naga ki PC/Insp. Marcelito Platino, tagapagtaram kan Quezon Police Provincial Office (QPPO), sinaysay kaini na nagpapadagos pa ngonyan an saindang mararumang imbestigasyon para maaraman kun ano an posibeng motibo sa pambabadil gadan sa biktima na si Sariaya Mun. Councilor Aristeo Manalo Ilao, 55-anyos na nangyari sa laog mismo kan harong kaini sa barangay Sampaloc 2.
Inaaram pa suboot kan mga pulis kun posibleng igwa nin koneksyon sa pulitika, negosyo o personal na kaanggutan an motibo sa paggadan sa biktima.
Naglalaom man an PNP na marikas an magigin dalagan kan imbestigasyon sa tabang kan manlaen laeng ahensya kan gobyerno na miyembro kan bibilugon na Special Investigation Task Group (SITG).
Marurumduman na nagkakakan sana sa laog kan saindang harong si Ilao kan biglang naglaog digdi an duwang armadong lalaki asin pinagbabadil an biktima na nagsapo nin tama sa saiyang payo.
