NAGA CITY– Nangapudan ngunian si Kabayan Partylist Rep. Ron Salo, member kan Committee on Overseas Workers Affairs sa mga undocumented Overseas FIlipino Workers (OFWs) na mag-likay dawa lifted na an employment ban sa Kuwait.
Sa entrevista kan Bombo Radyo Naga ki Salo, sinaysay kaini na makalihis pormal nang pinirmahan ni Labor Sec. Silvestre Bello III an department order na nag-susugo sa total lifting kan deployment ban kan mga OFWs sa nasambitan ng nasyon, mas pinahigot soboot an saindang pigigibong pagbabantay.
Sigon ki Salo, hihilingon soboot nindang marhay an implimentasyon sa pinirmahang Memorandum of Understanding na obhetong mas matawan nin protesyon an mga obrerong Pinoy sa Kuwait.
Alagad sigon ki Salo, kaipuhan man giraray na mag-ingat kan mga OFWs urog na an basta na sanang nagluluwas sa nasyon na mayo nin maninigong legal na dokumento.
Kaipuhan soboot na magsunod kan mga Pinoy sa tama asin legal na proseso urog na ta igwa man nin sadiring ley na pinapautob an Kuwait.
