NAGA CITY- Gadan an sarong parasira mantang irido man an duwang iba pa makalihis na tamaan an mga ini nin kikilat mantang yaon sa tahaw nin kadagatan sa banwaan nin Calauag, Quezon.
Sa entrevista kan Bombo Radyo Naga ki PC/Insp. Reynaldo Reyes, hepe kan PNP Calauag, sinaysay kaini na naglalawod suboot pasiring sa Poblacion kan banwaan hale sa barangay
Sinag an mga biktima na sinda Arnold Calaparan, 52-anyos; Luisito Calaparan; Vincent Magana siring man an tolo pa kaining mga kaibanan lunad nin sarong motorized banca.
Mantang yaon sa tahaw suboot an mga ini nin kadagatan kan magbulos an uran asin bigla na sana pigtamaan nin kikilat an operator kan baroto na si Arnold mantang nadamay man digdi sinda Luisito asin si Magana.
Sigon ki Reyes, haros nasulo an nagkapirang parte kan lawas ni Arnold na nagresulta sa tulos na kagadanan kaini.
Nagsapo man nin lugad sa saindang lawas sinda Luisito asin si Magana na tulos man pigdalagan sa ospital mantang maswerteng dae man nakadamay an tolong iba pang lunad kan nasambitang motorized banca.
Sigon ki Reyes, haros 10 kilometro na an rayo hale sa baybayon kan nasambitang motorized banca na kargado nin kopras asin pasiring kuta na sa Poblacion kan mangyari an insidente.
