NAGA CITY- Gadan an sarong notoryus drug pusher mantang arestado man an tolong iba pa kabale na an saro suboot na menor de edad makalihis na mapuli sa shootout an implementasyon kan warrant of arrest kan Philippine National Police (PNP) sa Lucena City.
Sa entrevista kan Bombo Radyo Naga ki P/Supt. Romulo Albacea, hepe kan Lucena City PNP, sinaysay kaini na pigpasairarom ninda sa buy bust operation an suspek na binistong si Ruben Amada alyas Scot na nangyari sa harong kaini sa Sitio Pagkakaisa sa barangay Cotta.
Apwera sa nasambitang operasyon, subject man sa implementasyon nin warrant of arrest si Amada na nahahampang sa kasong murder makalihis na masaksak kaini an sarong alyas Jetro na nangyari kan nakaaging taon.
Marikas suboot na nagdalagan pasiring sa ikaduwang iskalon kan saiyang harong si Amada asi pinaputukan kaini an mga operatiba kaya man napiritan nang magbalos nin putok an mga pulis.
Nagsapo nin tama sa saiyang payo an suspek na si Amada na nagresulta sa tulos na kagadanan.
Mientrastanto, tulos man na inarestar kan pulisya an menor de edad na live in partner suboot ni Amada asin an duwang suspek makalihis na maaktuhan an mga ini na nagre-repack nin pigtutubudang shabu sa laog kan harong kan nasambitang suspek.
Narekober sa pinangyarihan kan insidente an sarong cal. 38 revolver na ginamit suboot kan suspek asin tolong sachet na naglalaog nin pigtutubudang shabu.
Sa ngonyan, nagtitinir na sa kostudiya kan mga otoridad an naarestar na mga suspetsado mantang pig-aandam na an kasong isasangat laban sa mga ini.
