NAGA CITY- Dae nagpahuri an mga miyembror kan Kapisanan ng mga Broadkaster ng Pilipinas (KBP) Camarines Sur Chapter sa pakikisumaro asin pagtabang sa pigkokondusir na Brigada Eskuwela 2018 sa Don Leon Mercado High School sa barangay Pacol, Naga City.
Sa entrevista kan Bombo Radyo Naga ki KBP-Camarines Sur Chapter President Bong Echalose, sinaysay kaini na nagpadara sa saiyang opisina nin surat an manhamiento kan nasambitang eskwelahan para imbitaran an KBP-Camarines Sur na magin saro sa mga stakeholders na makikisumaro sa aktibidad.
Katakod kaini, nagdonar nin pintura an organisasyon asin tarabang man an mga representante kan manlaen laeng mga FM asin AM Station sa ciudad nin Naga sa pagpipintura sa sarong classroom sa nasambitang eskwelahan.
Magin an mismong station manager kan Bombo Radyo Naga na si Bombo Rita Labanon na nagtitindog na treasurer kan KBP-Camarines Sur asin an auditor kan organisasyon na si Kim Reolo kan Brigada News FM Naga nagtarabang man sa pagsisigid asin pagpipintura sa mga classrooms digdi.
Sigon ki Echalose, nakakahale suboot nin stress an pakikisumaro sa Brigada Eskwelahan asin maugma ini na nakatabang sinda para masierto na malinig an palibot kan eskwelahan antes pa an balik eskuwela kan mga estudyante sa Hunyo 4, Lunes.
Mientrastanto, labi man an pagpapasalamat ni Baby Ruby Llorente, principal kan nasambitang eskwelahan huli ta saro an KBP-Camarines Sur sa nakisumaro sa Brigada Eskuwela ngonyan na taon.
