Detainee sa CamSur, pinurbaran na maghugot sa laog nin detention facility; ginulgulan pa an sadiring liog

NAGA CITY- Nagpaparahay pa ngonyan sa ospital an sarong detainee makalihis na magpurbar na maghugot mantang yaon sa laog nin detention facility kan PNP sa ciudad nin Iriga.

Binisto an nasambitang detainee na si Wendell Fred Oliva, 44-anyos.

Sa nakuang impormasyon kan Bombo Radyo Naga, napag-araman na nadiskobre na sana ni PO2 Anthony Vargas na igwa nang hiwa sa saiyang lalamunan si Oliva makalihis na gulgulan kaini an saiyang sadiri gamit an sarong double sided blade.

Tulos man na pigdalagan sa ospital an nasambitang detainee para maipabulong an pigsapo kaining lugad.

Sa ngonyan, nagpapadagos pa an pigkokondusir na imbestigasyon kan PNP Iriga City para maaraman ano an posibleng rason sa purbar na paghuhugot kan nasambitang detainee.