(UPDATE) NAGA CITY- Pigbilog na kan mismong provincial fire marshal kan Bureau of Fire Protection (BFP) Camarines Norte an sarong grupo para matabang sa mas mararumang imbestigasyon katakod kan nawawarang firetruck kan BFP-Paracale.
Sa entrevista kan Bombo Radyo Naga ki F/Supt. Felix Lucio Guevarra Jr., sinaysay kaini na tulos siyang nagpaluwas nin sarong office order kun saen sarong grupo an saiyang pigbilog para tutukan an imbestigasyon sa pagkawara kan nasambitang firetruck siring man an pag-aram kun igwa nin posibleng paninimbagan sa pangyayari an fire marshal kan BFP-Paracale na si SFO1 Francisco Laborte.
Padagos pa nanggad suboot ngonyan an saindang pagkua nin mga impormasyon para maaraman kun hain na an firetruck asin para mabistado an nagngangarang Vincent na empleyado suboot kan lokal na gobyerno kan Paracale na nagkua sa bihikulo sa sarong talyer sa banwaan nin Daet kan nakaaging Mayo 31.
Sigon ki Guevarra, igwa na an PNP nin composite sketch kan nasambitang lalaki para sa mas marikas na imbestigasyon sa pangyayari.
Mientrastanto, pigsierto man ni Guevarra na igwa pang duwang firetruck na nagagamit sa ngonyan an BFP-Paracale.
