8 dating opisyal sa CamSur; nahahampang sa kaso makalihis maimbwelto suboot sa korupsyon
NAGA CITY- Maabot sa walong dating konsehal kan lokal na gobyerno kan Libmanan, Camarines Sur an nakasuhan nin Malversation of Public Documents makalihis madiskobre kan Commission on Audit (COA) an korupsyon kan mga ini.
Ini an pigkumpirmar ni Former Coun. Nonoy Dy sa entrevista kan Bombo Radyo Naga.
Sigon ki Dy, taong 2010 asin 2011 kan magpasa nin mga dokumento an walong dating opisyal kan LGU katakod kan pig-atendiran na Philippine Counselor’s League (PCL) Convention na pigkondusir sa ibang lugar.
Alagad, napag-araman na dae suboot nag-atendir sa nasambitan ng pagtiripon an mga opisyal alagad base sa resulta kan piggibong audit, nagluluwas na ginamit suboot an kwartang nakatagama para sa nasambitan ng aktibidad.
katakod kaini, sigon ki Dy, nagrekomenda an COA na magsunad nin maninigong kaso sa nasambitan ng mga opisyal.
Kaiba sa mga opsiyal na ini si dating Councilor asin nagtutukaw ngunian komo Acting Mayor Rommel Bulaong, mga dating konsehal Rodel Rasonable, Reynado Abay, Bernard Brioso, Vicente Chavez, Jerry Tindero, Roy Saniete asin Jose Antonio Ilanggo.
Marurumduman na nahahampang man ngunian sa tulong bulan na preventive suspension si Acting Mayor Rommel Bulaong huli sa nasambitan ng kaso.
