NAGA CITY – Binunyag kan 9th Infantry Division, Philippine Army na dati suboot na miyembro kan rebeldeng grupong New People’s Army (NPA) an suldado na pinagbabadil-gadan sa Pamplona, Camarines Sur.
Sa entrevista kan Bombo Radyo Naga ki Col. Paul Regencia, spokesperson kan 9ID, sinaysay kaini na dating NPA an biktima na si Pfc. Jhonny Franco, 31-anyos na naka-assign sa Military Intelligence Batallion kan 9ID.
Haloy na suboot nagsuko sa gobyerno an biktima antes na nagbagong-buhay.
Sigun ki Regencia, planado asin haloy na suboot binantayan kan mga suspek an mga hiro ni Franco bago ini tinambangan sa Barangay Veneracion sa nasambitan ng banwaan.
Pigtutubudan na mga miyembros kan NPA an mga suspek asin posible man suboot na tolo hanggang apat na miyembro kan rebeldeng grupo an nasa likod kan pangyayari kun saen halangkaw na klase nin baril an ginamit sa krimen.
Sa ngunyan kinukumpirmar pa kan Philippine Army an impormasyon na apwera suboot ki Franco igwa pang nakadamay sa pananambang.
Marurumbdoman na sakay nin motorsiklo si Franco kan tambangan ini kan armadong kalalakihan sa Barangay Veneracion kun saen natamaan ini nin bala sa manlaen-laen na parte ng hawag na kawsa kan saiyang pagkagadan.
