NAGA CITY– Padagos pa an ginigibong hararomang imbestigasyon kan Philippine National Police (PNP) katakod kan nangyaring pananambang sa sarong drug personality sa banwaan kan Sta. Cruz, Laguna.
Sa entrevista kan Bombo Radyo Naga ki P/Supt. Eliseo Bernales, hepe kan PNP-Sta Cruz, sinaysay kaini na pauli na kudta na kasuhapon nin alas-5:10 an mga biktima na sinda Victor Rana, Ricardo Rana at Jun-Jun Añonuevo sa banwaan kan Lumban hale sa RTC Laguna kan pauranan nin bala kan dae pa nabibistong riding in tandem suspects an saindang lunadan.
Sigun ki Bernales, katatapos pa sana kan pagdangog sa korte sa kasong may kinaaraman suboot sa iligal na droga laban ki Victor kan mangyari an pambabadil sa mga ini.
Tolos man na binawian nin buhay si Victor mantang irido an tugang kaini na si Ricardo asin maswerteng nakasalbar an saindang pamangkin na si Añonuevo.
Narekober sa pinangyarihan kan krimen an pitong basyo asin apat na slug na hale suboot sa cal. 45 na badil.
Dae pigdudahan kan PNP na posible an pagiging imbwelto ni Victor sa transaksyon kan iligal na droga an motibo sa pambabadil orog na magsuko suboot an biktima sa Oplan Tokhang sigun sa impormasyon hale sa PNP-Lumban.
Sa ngunyan naghahanap pa suboot an PNP-Sta Cruz nin mga CCTV Footages na posibleng makakapagturo sa suspek sa nangyaring pamamaril.
