NAGA CITY– Saro nanaman na menor de edad an nasalabay mantang nagkakarigos sa kadagatan na sakop kan Matukad Island, Barangay Paniman, Caramoan, Camarines Sur.
Sa entrevista kan Bombo Radyo Naga ki PO1 David Catangui, imbestigador sa insidente, sinaysay kaining nagkakarigos suboot an 8-anyos na biktima kaiba an saiyang pamilya sa nasambitan ng isla kan bigla na sanang masalabay.
Katakod kaini, tolos na dinara sa ospital an aki asin padagos na nagpaparahay.
Marurumdoan na enot nang nagadan an 7-anyos na Italian National makalihis man na masalabay mantang nagkakarigos sa saro pang isla sa Caramoan.
Nagpatanid an Philippine National Police (PNP) sa mga turista na doblehon an paglikay orog na an mga nagbibisita sa mga isla sa Caramoan, Camarines Sur orog na ngunyan na pabago-bago an kamugtakan kan panahon sa lugar.
Siniyerto naman kan PNP na preparado na an mga tauhan kan tourism office asin iba pang rescue team tanganing makataong nin marikas na responde sa kun ano man na disgrasya sa lugar.
An isla kan Caramoan, an saro sa mga lugar na pigdadayo kan mga turista sa Bicol huli sa magagayon na beach resorts asin tanawon.
