NAGA CITY– Gadan an sarong para-oma makalihis ining pagbabadilon kan dae pa nabibistong mga suspek sa Zone 7, Brgy. Samay, Ragay, Camarines Sur.
Binisto an biktima na si Ceasar Espinas, 54 anyos.
Sa entrevista kan Bombo Radyo Naga kay PCI Andy Rosero, hepe kan Ragay PNP, sinaysay kaini na nakadangog nin putok kan badil an aki kan biktima asin tolos naghagad tabang sa mga otoridad.
Tolos man na nagpasiring sa lugar an pulisya kun saen nadukayan kan mga ini an mayo nang buhay na si Espinas.
Sa inisyal na imbestigasyon kan mga otoridad nagluwas na may duwang tama nin bala an lawas kan biktima na nagin kawsa kan pagkagadan.
Narekober sa lugar an duwang shotgun shells na pigtutubodang gamit kan suspek sa krimen.
Sa ngunyan, mayo pa nin person of interest an mga otoridad katakod kan pangyayari alagad siniyerto ni Rosero na mapadagos an saindang imbestigasyon sa nasambitan ng insidente.
