NAGA CITY– Naka-heightened alert pa sa presente an mga unit kan Philippine Coast Guard (PCG) sa rehiyong Bicol makalihis an nagyaring pagsabog sa Masbate City Port kan nakaaging semana.
Sa entrevista kan Bombo Radyo Naga ki Lt. Marlowe Acevedo, tagapagtaram kan PCG-Bicol, sinaysay kaini na mas pinahigot pa kan saindang opisina an pigpapautob na safety asin security inspection sa mga pantalan sa manlaen-laen na parte kan rehiyon.
Nakikitabangan na sinda sa Philippine Ports Authority (PPA), Philippine National Police (PNP) asin sa Armed Forces of the Philippines (AFP) sa mas hararom na imbestigasyon sa nangyaring pagsabog sa Masbate City Port asin dinagdagan na ninda an mga K9 dogs na pigpapalakop sa mga pantalan.
Mientrastanto sa suhay na entrevista ki P/Supt. Paul Cabug, hepe kan Masbate City PNP, sinaysay kaini na hinahalat pa ninda an resulta kan chemical examination kan Provincial Crime Laboratory sa Masbate Police Provincial Office (MasPPO) sa narekober na pidaso kan bomba tanganing maaraman kun anong klase nin bomba an ginamit kan dae pa nabibistong mga suspek.
Sigun ki Cabug, naka-standby alert an mga pulis sa bilog na isla komo pagsunod sa kasugoan ni PS/Supt. Froilan Navarroza, provincial director kan MasPPO tanganing masiyerto na dae na maotro pa an insidente.
Marurumdoman na bigla na sanang nagsabog an pigtutubodang improvised explosive device (IED) na winalat sa magapong parte kan pantalan asin mayo man nakulgan sa insidente.
Tolos man na nakadulag an mga dae pa nabibistong mga suspetsado na lunad suboot nin motorized banca.
