NAGA CITY– Gadan an saro indibidwal mantang irido an saro pa makalihis an magkasuhay na insidente kan hit-and-run na nangyari sa banwaan nin Pamplona, Camarines Sur.
Sa entrevista kan Bombo Radyo Naga ki PS/Insp Greg Bascunia, hepe kan Pamplona PNP, sinaysay kaini na naglalakaw sana na nakainom an biktima na si Jerick Obal sa madiklom na parte kan kalsada sa Barangay San Gabriel kan bigla na sana ining mabudalan kan dae pa maaraman na klase nin lunadan.
Nairido an payo asin lawas kan biktima na nagresulta sa tolos na kagadanan kaini mantang marikas na nagdulag an dae pa nabibistong driver.
Mientrastanto irido an motorista na si Enrico Escalonda, 50-anyos makalihis na na mabangga kan kasabatan na six wheeler truck na nangyari sa Barangay Del Rosario sa parehong banwaan.
Sigun ki Bascunia, nakaiwas pa an motorsiklo na minamaneho ni Escalonda sa kasabatan kan nag-overtake na truck na minamaneho kan dae pa nabibistong driver.
Alagad posibleng nahagop kan truck an motorsiklo na nagresulta sa pagkatumba sa gilid kan tinampo.
Sa ngunyan nagpapadagos pa an imbestigasyon kan mga otoridad katakod kan magkasuhay na insidente kan hit and run sa nasambitan ng bnwaan.
