NAGA CITY– Pinakalma ngunyan kan Philippine National Police (PNP) an mga residente sa probinsya kan Camarines Sur makalihis an natalaan na enkwentro sa ultanan kan kapulisan asin mga miembro kan Concepcion Criminal Group sa banwaan kan Bato.
Sa entrevista kan Bombo Radyo Naga ki P/Supt. Venerando Ramirez, tagapagtaram kan Camarines Sur Police Provincial Office (CSPPO), sinaysay kaini na higot ngunyan an ginibong monitoring kan PNP sa manlaen-laen na lugar sa probisnya partikularmente na sa lugar na may presensya an nasambitan nang grupo.
Aminado si Ramirez na sa ngunyan, bako lang an mga rebeldeng New People’s Army (NPA) an saindang binabantayan alagad kabale na nasambitan na criminal group makalihis na makalaog sa probinsya.
Sigun sa monitoring kan PNP, sampolo na mga miyembro kan Concepcion Criminal Group an nakalaog na sa Camarines Sur hale sa reported na mga miyembro kaini na nagtitinir sa Albay.
Katakod kaini, nangapodan si Ramirez sa publiko na makitabangan sa mga otoridad tanganing mapugulan an ano man na mga planong pan-aatake kan nasambitan nang grupo.
Marurumdoman na naka-enkwentro kan kapulisan an nasambitan nang grupo sa banwaan kan Bato kun saen pirang mga bala asin badil an narekober kan PNP.
