NAGA CITY– Gadan an sarong miyembro kan Francisco Roberry Hold-Up Crime Group makalihis na suboot manlaban sa mga otoridad sa Barangay Poblacion 3, Calatagan, Batangas.
Binisto an suspek na si Roland Francisco.
Sa nakuang impormasyon kan Bombo Radyo Naga napag-araman na aarestuhon na sana an suspek sa lindong kan warrant of arrest laban ki Francisco alagad nakadulag pa ini pasiring sa madoot na parte kan lugar.
Alagad makalihis na mabagatan kan blocking team, tolos man na nagpaputok hasta sa matamaan si PO3 Garry Francisco.
Katakod kaini binalosan nin putok kan mga otoridad an suspek na nagin kawsa kan tolos kaining pagkagadan.
Napag araman na miyembro suboot kan nasambitan nang criminal group si Francisco na nag-ooperate sa Nasugbu, Calatagan, Lian, asin syudad nin Batangas.
Sa ngunyan, padagos pa an imbestigasyon kan mga otoridad dapit sa pangayayari.
