NAGA CITY- Aprubado na kan Land Transportation, Franchising and Regulatory Board (LTFRB) an pisong umento sa singil sa pamasahe kan mga pampasaherong jeep sa rehiyong Bicol.
Ini an kinumpirmar ni LTFRB Bicol Regional Director Vladimir Kahulugan sa ekslusibong entrevista kan Bombo Radyo Naga.
Sigon ki Kahulugan, kan nakaaging semana sana pigtao kan LTFRB Central Office an ‘go signal’ para maibwelta na sa P8 an minimum fare sa enot na apat na kilometro kan mga pampasaherong jeep sa rehiyon.
Katakod suboot ini kan haros sunod-sunod na umento sa presyo kan mga produktong petrolyo.
Mientrastanto, nagpuon naman suboot an pagtatao nin LTFRB-Bicol sa P5,000 na fuel subsidy cards na parte kan Pantawid Pasada Program (PPP) para sa mga jeepney drivers.
Target suboot kan ahensya na maipanao sa 3,200 na drivers an saindang mga fuel subsidy cards antes matapos an bulan nin Setyembre o sa Oktubre asin tulos man na ipapanao an dugang na 3,000 na subsidy cards para sa second batch kan programa.
