NAGA CITY-Arestado an sarong drug personality sa pigkondusir na buy bust operation sa sarong apartelle sa Barangay San Nicolas, Iriga City.
Binisto an suspek na si Francis Manuel De Lima, 39-anyos, pamangkin suboot ni Sen. Leila De Lima.
Napag-araman na kasali si De Lima sa provincial targetist asin pigkokonsiderar man komo saro sa mga high value target sa nasambitan nang syudad.
Sa nagunong impormasyon kan Bombo Radyo Naga hale sa Iriga-PNP, napag-araman na pinangenotan kan Philippine Drug Enforcement Agency Regional Office V (PDEA ROV) an operasyon, kun saen nadakop si De Lima sa laog kan apartelle na nakuanan nin anom na medium sized sachet nin pigtutubodang shabu na may timbang 25 gramos asin na may kantidad na P10,000 apwera pa sa mga drug paraphernalia.
Sa ngunyan, nagtitinir sa kustodiya kan mga otoridad an suspek na tanganing masangatan nin kasong pagbagar sa RA 9165 o Dangerous Drugs Act of 2002.
