Nagpaparahay pa an duwang menor de edad makalihis na aksidenteng mabudalan kan sarong kotse an saindang piglulunadan na padyak na nangyari sa Libmanan, Camarines Sur.
Sa pakikipag-ulay kan Bombo Radyo Naga kay P/Supt. Alejandro Monghe, hepe kan Libmanan-PNP, sinaysay kaini na pigbabagtas kan duwang 14-anyos na mga menor de edad an kalabaan kan Maharlika Highway sa Barangy Loba-Loba lunad kan saindang padyak kan aksidente ining nabudalan nin kotse na pigmamaneho ni Celso Encinas, 35-anyos.
Sigon ki Monghe, bigla na sana suminiko an padyak na pigmamaneho kan mga menor de edad para kuanun an sako nin paroy rason tanganing mabudalan an mga ini kan kotse ni Encinas.
Tulos man idinalagan sa ospital an mga biktima para maipabulong kan saindang sinapong lugad.
Sigon pa ki Monghe, nagkaareglo na an duwang lado asin napagkasurunduan na babayadan na sana kan driver kan kotse an mga gastos sa ospital, siring pa an kinakaipuhan sa pagpapabulong kan mga biktima.
