Pinagbabadil-gadan kan mga dae pa nabibistong persona an sarong lalaki sa banwaan nin Jose Panganiban, Camarines Norte.
Binisto an biktima na si Edgar Galvez alyas Egay, 49-anyos.
Sa nagunong impormasyon kan Bombo Radyo Naga, napag-aramang malunad na sana kuta sa saiyang motorsiklo an biktima kan bigla na man uminabot sa Barangay Luklukan Sur an mga suspek asin pinagbabadil si Galvez.
Nagsapo nin tama nin bala sa manlaen-laeng parte kan saiyang lawas an biktima na tulos man idinalagan sa ospital, alagad ipigdeklarar na ining dead on arrival kan mga doktor.
Narekober kan mga otoridad sa lugar kan pambabadil an sarong basyo na hale suboot sa sarong cal. 30 badil.
Sa ngunyan, nagpapadagos pa an ginigibong follow-up investigation kan mga pulis para sa posibleng pagkakabistuhan asin pagkakadakup kan nakadulag na mga suspetsado.
