Naarestar kan mga otoridad an duwang pigtutubudang miyembro kan New People’s Army (NPA) sa checkpoint operation kan mga pulis asin soldado sa Labo, Camarines Norte.
Binisto an mga naarestar na suspek na sinda Emilio Delos Santos, 34-anyos asin Jonelito Bibaro, 31-anyos.
Sa nagunong impormasyon kan Bombo Radyo Naga, napag-aramang alas-4 nin maguumagahun kasibago kan parahun kan mga miyembro kan Labo PNP asin mga kabuhan kan 96th Infantry Battalion, Philippine Army na nagsasagibo nin checkpoint sa hampangan kan Company Headquarters kan 2nd Provincial Mobile Force Company sa Barangay Bagong Silang 1 an piglulunadang behikolo kan duwang pigtutubudang mga NPA.
Nagpurbar pa kutang magbunot kan saindang darang mga badil an mga suspek alagad napugulan ini kan mga otoridad.
Narekober kan mga otoridad sa posesyon kan duwang mga suboot rebelde an duwang hand grenade, sarong cal. 45, cal. 22 revolver, mga bala asin sarong balisong.
Nagtitinir na ngunyan sa kustodiya kan 2nd Provincial Mobile Force Company an naarestar na mga suboot NPA para sa maninigon disposisyon.
