ARESTADO kan mga kabuhan kan Philippine National Police (PNP) an apat na mga pigtutubudang drug personality sa pigkondusir na anti-illegal drug operation sa Daet, Camarines Norte.
Sa nakuang impormasyon kan Bombo Radyo Naga, napag-araman na pigserbe kan mga otoridad an mandamiento de rekisa sa Barangay Cobangbang na nagresulta sa pagkakaarestar kan mga suspek na sinda Noriel Alcance, 38-anyos; Rea Sol, 36-anyos; Jojo Cañeba, 34-anyos asin Charlele Yao, 21-anyos.
Narekober sa pag-iingat kan mga suspek an apat na sachet na naglalaog nin pigtutubudang shabu, mga drug paraphernalia, tolong bala para sa cal. M14 asin M16 na badil.
Sa ngonyan, nagtitinir na sa kostudiya kan mga otoridad an nasambitang mga suspek na nahahampang sa kasong pagbalgar sa RA 9165 o an Comprehensive Dangerous Drugs Act of 2002.
