NAGA CITY- Nagpaparahay pa an anom na persona makalihis na magkasalpukan an sarong kotse asin ambulansya na nangyari sa Pili, Camarines Sur.
Sa nagunong impormasyon kan Bombo Radyo Naga, napag-araman na nag-overtake suboot an ambulansya na pagsasadiri kan local government unit (LGU) Baao asin minamaneho ni Wilfredo Quial, 52-anyos sa mga bihikulo na na-traffic sa kalabaan kan Barangay Palestina.
Huli digdi, aksidenteng nakabangga an ambulansya sa kasabatan kaining kotse na minamaneho kan pulis na si PO1 Peter Zafe na naka-assign sa Naga City Police Office (NCPO).
Tulos man na pigdalagan sa ospital an tolong lunad kan ambulansya na sinda Maria Deliva-Sorsona, 70-anyos; Marla Sorsona-Buena, 39-anyos asin an sarong 13-anyos na daragita siring man an lunad kan kotse na sinda Zafe, PC/Insp. Baltazar Valenzuela, 46-anyos asin si Edcel Briusa, 47-anyos.
Nagsapo nin lugad sa manlaen-laeng parte kan saindang lawas an anom na mga indibidwal na tulos man na natawan nin maninigong atensyong medikal.
Sa ngonyan, padagos pa an pigkokondusir na imbestigasyon kan PNP Pili katakod kan nangyaring aksidente.
