NAGA CITY- Isusunod na kan Municipal Disaster Risk Reduction and Management Office (MDRRMO) sa banwaan nin Sagñay, Camarines Sur an pagpaebakwar sa mga residente na nakaistar sa gilid kan Sagñay-Tiwi Road.
Sa entrevista kan Bombo Radyo Naga sinaysay ni MDRRMO-Sagñay Head Don Panoy, na pigpapangalad na ninda an pag-istar sa gilid kan Sagñay-Tiwi Road partikular na sa mga Barangay kan Patitinan, Sibaguan asin Bongalon huli sa nangyaring landslides kan Disyembre 2018.
Pinag-aadalan naman ngonyan kan lokal na gobyerno an rekomendasyon kan Mines and Geosciences Bureau (MGB) na pagpapangalad na mag-istar sa nasambitang tolong mga Barangay siring man an magigin temporary shelter para sa gabos na mga apektadong residente.
Sigon ki Panoy, enot nang pigdeklarar ‘no build zone’ an Barangay Patitinan urog na an tolong mga Sitio na labing nadanyaran kan landslide kun kaya mahigot ining pigbabantayan kan Philippine National Police (PNP) para masiertong mayong residenteng mapirit na mag-istar digdi.
Mientrastanto, nagkapirang aldaw makalihis na ipauntok an retrieval operation sa landslide area sa Barangay Patitinan, duwang naaagnas na bangkay an narekober kan kabuhan kan MDRRMO-Sagñay na nagpapataw-pataw suboot sa dagat.
Sa ngonyan, nagsakat na sa 33 an narekober na bangkay sa Sagñay mantang 13 iba pa an nagtitinir na nawawara.
